政壇：「路姆西」改名回歸照賣清
本來冇乜人識嘅狼公仔「路姆西」（Lufsig）喺月前被「一掟成名」後，隨即掀起搶購熱潮，雖然宜家傢俬將狼公仔改名為「路福西」，但市面仍然一狼難求。
小朋友成功買到「路福西」，開心到伸脷。
事隔個半月，Lufsig尋日復售，二千隻狼公仔之中，銅鑼灣分店就有七百隻配額。雖然店方已提早喺朝早九點半鐘派籌，但有市民六點半鐘已到場排隊，之後更出現排隊人龍。排第二嘅麥先生話上次錯過咗買唔到Lufsig，今次誓要買到為止。對於Lufsig已經唔係以前嘅路姆西，但麥先生就話一啲都唔介意，事關有網民話「福」音同某個四字英文粗口發言相似，依舊咁有玩味咁話。
店方喺半個鐘內派出超過二百五十張籌，開店後十分鐘內售出超過一百隻。截至尋日下晝三點鐘，宜家傢俬喺社交網站宣布全線狼公仔再度售罄，想撲狼公仔嘅市民要等到三月底先有機會喇。
