政壇：高永文行年宵買「高蕉」

多名高官都有去行年宵，支持吓啲檔戶兼振興經濟，尋日輪到食物及衞生局局長高永文去維園年宵兜番轉喇。據聞，佢尋日用咗近二千元幫襯啲年輕檔主買毛公仔，期間佢買咗條寫住「高蕉」嘅蕉形毛公仔，莫非因為政府喺H7N9病毒方面失守，令本港活雞齊齊被劏，所以要買條「高蕉」，寓意自己處理危機要高招啲？原來條蕉係啲檔主介紹佢買嘅，可能檔主想佢高招啲都未定。