政壇：長毛又拉布玩慶財爺
一四至一五年度財政預算案下月二十六日揭盅，正當市民關注財爺鬍鬚曾今年會否繼續「派糖」，其實預算案仲暗藏「拉布」危機，皆因去年有份拉布嘅立法會議員「長毛」梁國雄有意今年重施故技，迫使政府推行全民退休保障計劃。
設計圖片及對白
仲記得包括長毛在內嘅「拉布四子」，舊年為要求政府推行全民退保發起拉布戰，歷時近一個月、審議逾百小時，不但係回歸以來審議時間最長嘅預算案，亦係鬍鬚曾出任財爺六年來首次遇着拉布，難怪鬍鬚曾早前都不諱言舊年最難忘嘅新聞就係拉布風波，籲議員今年咪再搞。
曾鈺成或刀下留情
不過鬍鬚曾今年繼續有得震冇得瞓，原來長毛決心響應學民思潮硬銷嘅五區總辭、變相公投方案，以辭職要脅政府順應泛民主派建議嘅公民提名方案。不過，政府前年已修例，限制辭職議員半年內再參選，所以長毛今次一旦辭職，變相短期內重返立法會無望，逾五十萬元約滿酬金不但凍過水，十年議員生涯亦暫告一段落，所以長毛呢次拉布可謂佢嘅「告別作」，一定要做場好戲畀支持者同鬍鬚曾。
據了解鬍鬚曾早已聞到「味」，並已積極諗計睇吓點樣應戰，但眼見決定拉布成敗嘅關鍵人物、立會主席曾鈺成近來同泛民愈行愈埋，加上舊年剪布嘅決定獲終審法院接納上訴申請，政府中人擔心舊年勇猛「剪布」嘅曾鈺成，今次為免得失泛民而「刀下留情」，令剪布之日遙遙無期。
政府中人對此都感到無可奈何，慨嘆政府可能真係要重演美國聯邦政府去年因為眾議院講唔掂數、而一度「停擺」嘅鬧劇咁樣，任由全港十六萬名公務員「冇糧出」，兼且停止公共服務，將政府置之死地，先有望扭轉拉布亂局。
