涉貪舉報急跌 哀莫大於心死

監察廉署工作嘅四個獨立諮詢委員會尋日舉行年度記者會，匯報廉署過去一年工作情況，其中接獲貪污舉報錄得近年新低，由前年嘅三千九百幾宗降至二千六百幾宗，跌幅達到三成三；而可追查投訴更加只得一千七百幾宗，勁跌超過四成，你都咪話唔犀利。舉報劇減情況罕見，四個監察委員會之一嘅貪污問題諮詢委員會主席周松崗亦不得不嚴肅對待，話對情況表示關注喎。

周松崗都算係超級樂天派咯，貪污舉報忽然急挫，居然只係表示關注，計太一叮話齋，情況直頭令人憂心喇。即係咁，舉報投訴失驚無神大幅減少，原因當然唔排除係貪污罪行減少咗，不過更大嘅可能性係廉署金漆招牌蒙污，市民對反腐利劍失去信心咯，咪索性慳番啖氣囉。好簡單，舉報投訴嘅跌勢由上年首季至年中開始，呢段期間正正係前廉政專員湯顯明貪腐醜聞陸續曝光嘅時候，話兩件事冇任何關連，細路仔都唔信喇。

呢啲咪叫哀莫大於心死囉，前特首曾蔭權爵士兩年前爆出連串貪腐醜聞，廉署調查查到無晒下文，已經引起社會質疑啦。點知廉署處理貪湯案件又係咁，手軟腳軟，唔嗲唔吊，畀呢隻貪腐小烏蠅也文也武，居然大言不慚到反問佢違咗乜嘢規，市民睇見咁嘅荒謬一幕，仲點相信廉署有決心同有能力反腐懲貪吖？「絕代雙貪」貪腐醜聞罄竹難書，鐵證如山，咁都可以繼續逍遙法外，廉署自己話喇，市民踴躍舉報有乜嘢用吖！

話時話，市民對本港廉潔信心盡失，唔止反映喺舉報投訴急跌。早前有大學發表民調，市民期望香港成為廉潔社會嘅比率升至歷史高位，高達百分之三十三。正如蜜運中嘅男女唔需要祈求行桃花運，如果廉署肅貪成功，香港廉潔可保，市民需要許願求廉潔咩？

咁講啦，一杯水究竟係半滿定半空，其實都唔重要，最重要係既然知道杯水未滿，就去設法裝滿佢。同樣道理，無論舉報貪污急跌嘅成因係乜都好，當局家陣最緊要面對現實，既然知道貪曾貪湯係摧毀本港廉潔及法治嘅禍源，就必須出動狗頭鍘，將佢哋繩之以法，令市民回復信心。

最後，太一叮提醒周松崗，對貪腐惡化淨係感痛心係唔夠嘅，一定要坐言起行督促廉署做嘢，如果唔係，仲要你哋諮詢委員會把鬼吖，叮！