城中鏡：阿里打企鵝關騰訊事?
阿里巴巴多方位撼騰訊，手機遊戲平台戰場尋日開鑼，主打遊戲數目唔算多，但噱頭十足，有網民話，其中兩個主打遊戲都包含「打企鵝」嘅場景，令人聯想到阿里係咪借故，攞騰訊嘅吉祥物QQ企鵝來開玩笑？
傳聞阿里內部正興起一股「打企鵝旋風」，首席執行官陸兆禧都有玩埋一份。
據內地網民話，阿里透過「來往」推出嘅「來玩吧」平台，主打嘅《啪啪啪》與《啵啵啵》均巧合地加入打企鵝嘅場景。甚至有八卦傳聞話，隨着網遊平台上線，阿里內部正興起一股「打企鵝旋風」，首席執行官陸兆禧唔單止玩埋一份，仲喺遊戲排名中獲得第二名。阿里主席馬雲早前講過，要阿里開展「火燒南極」戰略嘅說法，咁打企鵝又幾符合呢個口號喎。
馬雲搞手遊，當中發生咗啲風波。網上媒體早前報道，馬雲妻子張瑛為咗看管沉迷網絡遊戲嘅兒子，辭去阿里嘅工作。馬雲幾日前喺自己個「來往」帳號中澄清，呢個說法係假嘅。尋日又喺「來往」帳號中，分享一編有關「堅守承諾不容易、打破承諾更不容易」嘅短文，當中提及新加坡資政李光耀，對於新加坡由禁賭變成容許賭場經營嘅感言，大有是要為阿里破例涉足網遊與手遊解畫之意。
