城中鏡：聘傭講彩數 名人籲包容
本港最近先後揭發多宗港人僱主虐待外傭案，掀起全城關注，但亦不時聽到有僱主埋怨畀外傭玩殘，點樣維持良好賓主關係，真係大有學問。家中有多達五個外傭嘅愛沙尼亞駐港名譽領事林建康太太黃寧艷坦言，曾經遇上印傭偷偷狂打長途電話，帳單長達二十頁。廠商會會長Irons施榮懷就曾碰上經常打扮性感兼喜愛夜蒲嘅菲傭，頭痛到極。不過，佢哋都呼籲香港僱主對外傭多啲包容，體諒對方離鄉別井來港打工嘅苦處。
家有五個外傭嘅林黃寧艷話，外傭生活文化與港人有差異，相處要多付出愛心同耐性。
施榮懷（左）遇過一位喜愛夜蒲嘅菲傭，一度好頭痛。旁為其胞弟施榮恆。
史立德聘請外傭二十多年都無嘗過激氣事，秘訣係畀對方多啲休息時間同假期。
林太對外傭向來好長情，家傭平均打工六至八年，夠晒忠心。不過幾年前，林太曾遇上一個蠱惑印傭，趁佢同老公外遊新加坡幾天，即刻日日狂打長途電話返印尼。林太返港後收到厚厚帳單，當堂嚇咗一跳，細問之下，原來係一位新丁印傭作怪。最慘係對方被揭發後，仲死撐唔關佢事，激到林太紮紮跳，最後惟有解僱對方。
畀多啲休息時間同假期
林太承認請外傭多少講彩數，未必個個啱心水，佢個人就偏向聘請資深外傭，會較少撞板。佢又特別提醒其他僱主，指唔少外傭初到香港時人生路不熟，相當驚青，有啲人甚至連搭電梯都腳震，僱主宜多包容及體諒，避免衝突爭拗。
講起「問題外傭」，Irons自爆佢都請過一個，對方常作性感打扮，每次出門例必穿上迷你裙，行徑惹人懷疑，有次深夜十二點施太推開房門，發現菲傭仲未返屋企，屢勸不改後終要下辭退令。
仁愛堂前主席史立德就相當好彩，聘請外傭二十多年都未嘗過激氣事，佢自言秘訣係給予外傭多啲休息時間同假期：「千祈唔好當對方係一隻牛，一日二十四小時要外傭做嘢，係人都煩躁。適當時候應該畀對方抖抖，放幾日假輕鬆吓。」
