印傭Erwiana被虐打到不似人形，負重傷上機離港，咁嘅情況下，點解入境處職員可不聞不問，甚至曾懷疑，及報警追究？噢！call白車？當然無諗過啦！

尋日，「終於」有「代表」出嚟解畫嘞！佢話，係因為Erwiana嘅膚色頗深，唔係「好覺」佢受傷喎！吓！膚色？咁非洲黑人咪呢世都唔會有病？唉！咁都講得出口，真有病囉！

今天，香港急速沉淪，就係一班庸官連講廢話都廢過人所致！連度個廢無倫的藉口也無能為力，香港唔PK就有鬼矣！

嗱！你哋班廢柴政府內的低B庸官，好應跟專講高級廢話嘅高手，那個政制及內地事務局局長譚志源學嘢啦！佢師承前朝公公林瑞麟嘅，所得真傳，更青出於藍o架！

早前，香港市民要求政改提名方案須確保有不同政見的人可以「入閘」選特首時，譚公公答：「現時唔少建制派政黨都反政府，而泛民嘅卻周不時撐政府，所以，好難定義何為『不同政見人士』喎！」你哋話佢幾得吖！仲有，喺一個政改諮詢會內，譚公公成個未來政務司司長咁款回應何解「有九成港人」力撐的公民提名，但都得唔到政府接納時，佢咁講：「我相信最緊要係有飯開啫！唔啱食就食住先啦！唔係肚餓就唔係幾好！」無飯，只有蕉，還係爛臭霉嘅！你譚志源去食吧！

上述兩個「K屎」，皆顯露譚公公嘅絕世口技，唔好話係下屆政務司司長熱門，依家林鄭宣布唔出賽選特首，譚志源可代出征，特首都有得做呀！

難怪佢前日喺人家本來高高興興行花市，要忘卻政治憂愁時，佢不怕被人噓爆，嗌佢落地獄，都去維園宣傳政改啦！博到盡也！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps