勞工及福利局局長張建宗尋日出席立法會人力事務委員會會議時「兩面受敵」。多名勞工界議員炮轟施政報告隻字不提取消強積金對沖機制，標準工時立法一事也拖延多時，紛紛向佢「追數」。工聯會「嫻姐」陳婉嫻質疑政府有乜嘢工作朝向標準工時立法嘅目標，「唔好講咗就等於完成政綱」，又批評政府一方面喺福利問題上願意走前一步，相反喺勞工問題上「左搖右擺」，王國興就促請政府考慮，帶頭取消政府合約制員工嘅強積金對沖機制。

設計圖片及對白

商界亦對政府近年政策疑偏向勞工界有很大意見。飲食界議員張宇人批評政府，當年勞資雙方就強積金對沖機制有共識，不點名指目前有勞工界議員講乜，當局都正面回應，相反對於商界利益「一忽忽閹又有，大刀斬埋嚟又有」，反要求政府考慮輸入外勞。

張建宗強調取消強積金對沖機制問題相當複雜，會就此認真研究。對於被質疑政府喺勞工問題上左搖右擺，張建宗就推說要默默耕耘，嫻姐質問佢仲要耕幾耐，佢就形容自己已經耕到「出緊汗」。

老實講，張建宗有冇諗過，自己就有長俸保障最多都係做到出汗，因為強積金對沖而唔見晒啲退休金嘅打工仔女就係出緊血呢？

第一手消息請下載on.cc東網iPhone/iPad/Android/Windows Phone Apps