政壇：Greg蘇張炳 借水晶球過橋

噏唔出航空業經濟效益

Greg蘇同張炳尋日前後腳出席經濟發展事務委員會會議，向議員們簡介施政報告相關措施。工黨議員張超雄批評當局為求旅遊業經濟增長，不惜犧牲香港人生活質素。人民力量陳偉業亦話，香港人以前喺假日可以去旺角同銅鑼灣等旺區閒逛，但依家已經無地可行，鬧爆當局繼續增加接待旅客係無視港人權益，促請政府收取入境稅。

有議員問阿Greg當局能否預測未來數年訪港人次，佢就答話政府冇水晶球預測具體準確數字，但就粗略估計至二○一七年，訪港旅客將會增加到七千萬人次。佢又話香港屬於外向型經濟，難以為個別組群旅客或整體旅客人數設定上限。至於減少過多旅客集中喺同一地方，佢話當局會同十八區合作，喺各區增加景點分流旅客。

張炳其後回應公共專業聯盟梁繼昌嘅提問，話機場管理局已開始增建飛機停泊位，包括喺西停機坪增建二十八個停機位，及擴建機場中場，兩項工程分別會喺今年底同明年完成，預計到時飛機停泊位會增加三成半。

梁繼昌又問當局有無計過施政報告嘅航空業政策會為本港帶嚟幾大經濟效益，張炳就同樣話自己冇水晶球，解答唔到佢嘅問題。