醫生左右又不分 醫學奇譚知多少

話明係醫學奇譚，當然唔止咁少喇。呢，有醫生將塑膠引流管留咗喺產婦體內，覆診檢查都冇發現，直到病人話感覺體內有異物，至做手術攞走。除咗膠管，仲有留喺血管內嘅硬鐵導管，同留喺股骨嘅金屬零件，千奇百怪，問你驚未！

咁都未算吖，聯合醫院仲恐怖，一位長期患病嘅老婦懷疑被錯誤處方長達三個月嘅強效類固醇，其後因併發症不治。雖然暫時唔肯定死因係咪同開錯藥有關，但專家話涉事藥物屬高劑量強效類固醇，一般唔可以服用超過兩星期，家陣處方時間多好幾倍，醫生疏忽搞錯，藥劑師居然冇發現問題，可想而知公立醫院管理幾咁混亂！

話時話，公立醫院醫療事故層出不窮，無日無之，市民早就見怪不怪咯。講到管理混亂，近排搞到沸沸揚揚嘅中文大學心臟科教授余卓文被「封刀」風波，可以話係醫管局無能兼混帳嘅典型例子。

「封刀」事件擾攘近一年，誰是誰非到依家都未搞得清楚。醫學會邀請六名海外專家做嘅調查報告，認為余卓文嘅手術「不涉醫療失當」；而威爾斯親王醫院調查小組嘅報告就話要求余卓文封刀「合理」喎。

咁就好笑喇，一個話合理，一個話唔合理，市民到底可以相信邊個呢？咁小嘅事都一拖再拖，搞到滿城風波，班醫療高官真係愈來愈廢，唔怪得公立醫院烏煙瘴氣喇。

講開呢班廢官，直頭火都嚟埋。公立醫院服務質素不斷下降，人手短缺係主要原因，醫管局明知問題出喺邊，但從來冇認真諗辦法解決，反而本末倒置，令問題更加惡化。呢嗱，醫管局舊年增聘二千人，人就夠多嘞，可惜多數係管理和資訊科技人員，醫生僅佔約百分之二，即係話官多過兵，咁搞法，服務水平有乜可能提高吖！

一句到尾，公共醫療系統百病叢生，病源就係醫管局班渾渾噩噩嘅高層，如果唔徹底改革，唔改變疊床架屋、肥上瘦下嘅行政架構，市民求醫只能夠繼續攞命博嘅咋，叮！