「唔好同我分手！」小駿跪在女友前哀求。可惜一巴又一巴，連續十四巴摑得小駿無地自容，「你求我都無用，大家再見不是朋友。」小駿死心不息，「我對你咁好，你要乜有乜，唔使餐餐食麥麥，你仲想點？」

「食麥麥？有得食都好，依家你叫我捱街邊兩蚊包咋！仲問我想點？我想要安全感呀！」女朋友儼如女帝，小駿更加閃縮，「我咪為我哋安樂窩努力緊！」女朋友一聽，怒火更盛，「輪公屋都叫努力？排到六十歲都唔知有未！」

小駿回想起自己大學畢業就失業，人哋養狗，佢就做狗，日日被「收數佬」追還錢，「我讀書同政府借嘅錢都有排還，私樓又咁貴，唔輪公屋仲可以點？」女朋友一手推開小駿，「你唔好煩我，我新男友就嚟過嚟接我！」

一位滿身金光、手持皮篋的男子迎面而至，女朋友上前挽其手，「Honey，點解咁耐？說好的一百萬呢？」只見男子打開皮篋，內裏物品一湧而瀉，小駿被一地人民幣嚇得目瞪口呆，男子不屑地看小駿，語帶鄉音說︰「成功需父（苦）幹！」

第一手消息請下載on.cc東網iPhone/iPad/Android/Windows Phone Apps