SUN搞作：少膽虫手記：精神虐待
淫賤黎一早氣急敗壞返到堆填區，左摷右摷神色慌張，我作為貼身擦鞋仔，梗係要去關心下。「腦細，唔使慌，天跌落嚟都有我頂住……」嘭！一拳揮來，我有如潘安嘅俊臉已遭重擊，淫賤黎懶理我死活，只喝令：「快啲同我搵本passport出嚟，我要匿一匿！」
淫賤黎見我O晒嘴，亦知好難瞞住我就走咗去，惟有和盤托出：「我虐待印傭，呢排風頭火勢，唔匿埋隨時上頭版！」淫賤黎加埋虐待，我即刻向住SM方向思考：「腦細，估唔到你真係賤成咁……」淫賤黎也不反駁，長嘆一聲，徐徐道出究竟：「為咗動呻吟嘅點擊率，我上個月開始柯打屋企個印傭日click夜click，仲要挾佢click唔夠數就扣人工，點知佢呢排睇見新聞，就話要踢爆我精神虐待！」
又係嘅，動呻吟條條都係誨淫誨盜嘅爛片，要個印傭日click夜click，日睇夜睇，呢種精神虐待，仲慘過畀人打一身。喺呢個時候，我忽然醒起，動呻吟嘅點擊率一直都冇升過，哈，睇嚟係印傭姐姐略施小計，要嚇下淫賤黎啫。為咗成人之美，我決定以搵passport為名閃咗去，等淫賤黎自己一個驚餐飽。
