SUN奇古怪：SUN潮語：【河 蟹】

最近有一份報章管理層撤換總編輯，擬由一位東南亞籍嘅非本地人出任新老總，一時之間，好多意見領袖及輿論界都話香港嘅新聞自由今非昔比。不過，香港新聞自由度倒退都唔係咩新聞，香港嘅新聞自由喺地區嘅排名，自從主權移交開始就不斷下跌，甚至連CCTVB呢啲電子傳媒，近年嘅公信力都備受質疑，傳媒自我審查已經係公開嘅秘密。相信呢啲都係同中國大陸接軌嘅過程，皆因大陸不嬲無言論自由，香港繼續無王管咁打擊政府威信影響管治。好多共幹睇唔慣呢種所謂西方價值，梗係要落手整頓香港媒體一番。最好香港傳媒「河蟹」到好似偉大祖國一樣，全部都愛國愛港，為黨同人民服務，咁香港就天下太平，安定又繁榮！

「河蟹」呢個潮語我諗大家都唔會陌生，呢兩個字喺好多本地傳媒嘅標題都經常出現。潮語「河蟹」當然唔係指大閘蟹呢啲可以食落肚嘅生物，雖然唔排除有人會將「河蟹」「good」聲吞落肚，但係「河蟹」同真嘅蟹一樣，係蹺口劖手，唔係話吞就吞到。

喺中國大陸因為言論受到監控同限制，未經審查，係絕對唔容許一啲敏感嘅話題又或者對政府嘅批評喺網上或媒體出現。一經發現有影響國家穩定嘅言論，就會遭到刪除，以維持國家穩定和諧發展，網民及國內人士就稱呢個現象為「河蟹」，或者話言論被「河蟹」食咗。有時言論不但會被「河蟹」刪除，更會連網上帳戶都會被停用，依家嚴重者仲會被逮捕，監都有得坐。

後來「河蟹」呢個潮語傳入咗香港。雖然香港暫時仲未試過以言入罪，但好多香港傳媒已經自我「河蟹」起嚟，甚至好多商界同娛樂圈中人，都自我「河蟹」一番，凡親有敏感言論或創意作品，都會唔畀佢出街，暗地裏篩走。其中例子就有香港芭蕾舞團董事之一，因為不滿一個舞劇作品中含有文革內容，而要創作者喺演出嘅時候將該段舞刪減，呢啲就係正宗「河蟹」嘅表現。