政壇：搞搞政：張建宗喜得打鐵副手
政府呢個「熱廚房」頻傳有人跳船，另一方面亦不斷有新人加入。我哋聽到可靠消息，話勞工及福利局近日都搵到副局長人選嘞，即係話，勞工及福利局局長張建宗終脫離一直以嚟嘅孤掌難鳴苦況，有個副手，放假有人頂，落立法會、區議會甚至落區都唔使吓吓自己親自上陣，內地官場興以打鐵譬喻做官，張建宗一個人打咗咁耐，總會攰嘅，依家搵到幫手，真係開心囉。
設計圖片及對白
自從擴大政治任命制以來，政府嘅第二層政治任命官員一直唔齊腳，我哋尋日先報道，發展局搵咗前候任特首辦項目主任馮英倫做政治助理，加上張建宗搵到副手，咁樣嘅話，應屆政府問責班子有望齊晒腳。
講起政府搵人，特首梁振英前年組班時，親自搵陸恭蕙做副局長，睇中佢做過立法局議員，比起只得專業人士背景嘅黃錦星，政治履歷較豐富。點解要搵個有政治履歷嘅人？據講有環保團體中人話，當年黃錦星上任後出席酒會，有人祝賀佢做局長，但佢竟然同對方講：「將來靠你搞政治工作喇，我就做政策工作。」黃錦星做得局長，竟然冇諗過做政治工作？唔會咁單純吓嘛？難怪之前佢搞擴建堆填區搞到一鑊泡啦！
