政壇：刑檢專員同證監有番偈傾
本港政壇及股壇都各有個「長毛」，雖然一個華裔一個外籍，但不約而同都係夠出位！記得前任刑事檢控專員薜偉成臨別秋波前，曾公開質疑證監會嘅執法權力過大，雙方關係一度「緊張」。尋日新任刑事檢控專員楊家雄出席證監會首次舉辦嘅論壇後，「股壇長毛」David Webb就形容，證監會同新任刑事檢控專員嘅關係好似已離婚嘅夫婦，「開始有番偈傾！」
被問及雙方關係係咪開始好轉時，Webb笑住話：「佢哋關係應該冇可能再差得過以前！」佢個比喻真係令人笑到碌地，但諗真啲，又真係幾貼切喎。話說尋日楊家雄出席論壇，同有「打虎英雄」之稱嘅證監會法規執行部執行董事施衛民同場較量，互相切磋，氣氛都唔錯。
證監會近排「打老虎」打得好積極，上市公司監管權似亦「不經不覺」由港交所轉移到證監會。有中環人士話，證監會依家係前所未有咁「強勢」！
