政壇：楊立門退休下屬爭上位
有「政務官歌王」稱號嘅民政事務局常任秘書長楊立門（Raymond）已經申請退休，仲會喺年中就開始退休前休假，明年正式離開政府呢個熱廚房，外界對佢退休有唔少揣測，但對一眾等緊上位嘅政務官就可能係喜訊喇，皆因官場中常任秘書長呢個職位一直「供不應求」。
好似現任康樂及文化事務署署長馮程淑儀同旅遊事務專員容偉雄就係等緊上位，另一位被視為官場叻人嘅前財經事務及庫務局常秘應耀康，佢之前因為屋企有事提出無限期休假，早前家事處理完畢，原本想回巢，可惜政府中暫時冇啱嘅位，就被借調咗去競爭事務委員會。
講番Raymond，佢加入政府三十幾年，依家五十三歲半，距離政府公務員五十五歲退休年限唔遠，加上累積咗一年假期，明年中就啱啱五十五歲，計落其實都差唔多時間可以申請退休。而政府中，仲有另外兩個常秘最快今年退休，包括財經事務及庫務局常秘區璟智同運輸及房屋局常秘栢志高，佢哋嘅退出，將令政府團隊多咗三個常秘職位空缺，勢掀起新一輪官位調動。
