政壇：蔡冠深創立港韓商貿會

韓風勁吹下，韓國產品同流行文化對港人吸引力日增。中華總商會永遠榮譽會長蔡冠深喺韓國駐港總領事趙鏞天穿針引線下，聯同居港韓商同本地生意人，成立港韓商貿協會，並擔任創會會長，期為港韓商貿合作謀求雙贏之道。

趙鏞天（右）穿針引線，促成蔡冠深（中）同韓商金範洙（左）等人成立港韓商貿協會。

蔡冠深話，韓國流行文化不但奇峰突出，就連工業產品亦令人刮目相看，無論大如船舶、小至手機，港韓兩地都有好多合作機會。佢話，好多韓國貨品質優良，但係港人多數因唔識睇韓文使用說明而卻步，倘若韓商在包裝上加添中英文說明，相信韓國產品在港嘅銷售空間將會更大。

講起韓國流行文化，趙鏞天話過往香港嘅文化產業亦曾盛極一時，例如佢讀大學時嘅港產電影相當受歡迎，周潤發同成龍都係街知巷聞嘅電影明星，但可惜時至今日，港產電影委靡不振，佢稱讚香港電影製作認真，希望可以重拾往日嘅光彩。