政壇：密會夏千福?貪曾鬼祟又想攪局
因連串貪腐醜聞而成為過街老鼠嘅「貪曾」前特首曾蔭權爵士，已經沉寂一時，但尋日佢又再度出沒，仲同太太曾鮑笑薇返咗位於半山堅尼地道嘅前任行政長官辦公室（前特首辦）添。咁神心返去前特首辦，究竟所為何事呢？咁啱得咁蹺，我哋就目睹美國駐港總領事夏千福同貪曾前後腳咁離開前特首辦。眾所周知，夏千福之前多次被指干預香港事務，唔通貪曾同夏千福密會又想攪局？
夏千福（右）尋日去咗前特首辦公室，但美國駐港總領事館未有回應佢係咪同貪曾見面。
夏千福離開後五分鐘，貪曾喺保鏢包圍護送下離開前特首辦，非常鬼祟。
貪曾太太曾鮑笑薇（左）喺保鏢護送下，同貪曾前後腳離開前特首辦。
貪曾尋日返前特首辦，貫徹佢一向鬼祟作風，返去之前先搵保鏢探路，由保鏢先行開出佢架七人專車到達，疑似施行調虎離山之計，以避開耳目。
直到下午三點幾鐘，我哋就見到夏千福同一名隨行男子，喺一名疑似前特首辦人員陪同下從前特首辦行出嚟。
前特首辦昨前後腳閃人
約五分鐘後，貪曾夫婦亦都喺保鏢護送下前後腳步出，然後登上七人車離開。不過，貪曾夫婦離開時好鬼祟，搵多名保鏢包圍遮擋途人視線，好似唔見得光咁，話佢唔係有陰謀都真係冇人信啦！
香港正值政改諮詢敏感時期，如果貪曾真係密會夏千福，究竟所為何事呢？莫非想勾結外國勢力密謀攪局或有驚天大陰謀？定係佢知道自己被廉政公署調查緊單貪腐案，預期快將被落鑊，所以尋求協助？
美駐港領館冇正面回應
我哋分別問過前特首辦同美國駐港總領事館，究竟夏千福去前特首辦係見邊個、所為何事同傾咗啲咩？美國駐港總領事館發言人冇正面回答夏千福同邊個會面，只係話定期同港、澳兩地嘅學術界、商界、文化界、政界等唔同界別人士會面係佢哋平常工作，至於前特首辦就未有回覆。其實夏千福要四出收風都唔怪得佢，但揀人收風都要有個譜吖，竟然去搵政治能量近乎零嘅貪曾收風，唔知收到嘅係咪發噏風呢？
