政壇：阿Ann倡紅牌阻嚇
立法會本來係莊嚴嘅議事重地，但有部分立法會議員為求出位，周不時會喺各大小會議上大講粗口諧音同粗言穢語，令到其他議員尤其係女性議員好谷氣！建仔嘅蔣麗芸（Ann）尋日就大吐苦水，話自己同黨友陳鑑林已經分別去信議事規則委員會主席譚耀宗同大會主席曾鈺成，要求秘書處修改議事規則，賦予主席更大權力，將嗰啲講粗口嘅議員趕離場，仲要停職扣薪兩日。嘩！出到紅牌同罰錢兩招，阻嚇力都好大喎！
最搞嘢嘅係，阿Ann唔知喺邊度搵嚟一九二九年十二月嘅《香港政府憲報》，當中第二十三條「會議常規」中寫明，如果有議員喺會議中發表不當言論或者擾亂會議秩序，主席有權暫停佢嘅議員職務。搬出八十五年前嘅產物，都係因為對立法會現狀太不滿，佢話部分「爛口」議員周不時都會喺開會時扮詼諧大講粗口諧音，認為議事規則應該針對呢啲議員提出更嚴厲罰則，令立法會重回有規有矩嘅年代。
黨友鍾樹根都係「疑犯」
阿Ann話，下一步將會尋求其他政黨支持佢嘅建議，對於議員劉慧卿素來主張「非暴力非粗口」，阿Ann話遲啲都會聯絡議會內其他女同事爭取支持，又話女性對粗口嘅反感度一定會大過啲男同事多多聲。不過，阿Ann黨友鍾樹根早前開會時先爆出「收皮」呢個疑似粗口，之後上電視節目又大講「肯肯定」等出位言論，唔知阿Ann會唔會喺立法會提出有關建議之前先提醒對方講少句呢？
講起要規管粗口，教育局局長吳克儉尋日同傳媒茶敍時話，當局就快完成有關「爆粗」教師林慧思嘅報告，最快下個月會向特首提交，報告內容大部分吸納林慧思任教學校所做嘅報告，再補充近月最新發展。
