權貴僭建執法慢 屋署官僚懶懶閒

係咁嘅，申訴專員公署主動調查屋宇署一套專門處理名人僭建嘅特別程序，踢爆大部分個案執法延誤。點延誤法？公署分析咗十五單比較嚴重嘅名人僭建個案，發現其中九宗執法歎慢板，有屬於優先取締嘅個案半年未發出勸喻信，有個案勸喻信期限屆滿一年仍未發出清拆令，有個案收到警告信八個月後至被檢控，亦有個案喺傳媒曝光後十日至有屋宇署職員上門調查。當局馬虎求其，敷衍塞責，唔怪得申訴專員公署直斥執法延誤係屋宇署嘅通病，效率難符合公眾期望。

畀人踢爆執法不力，屋宇署點解畫呢？佢哋話喎，執法一視同仁，不偏不倚，唔會因為業主係高官或知名人士，就加快或拖慢程序喎。大家信唔信吖？如果屋宇署執法真係公正不阿，執正嚟做，申訴專員公署就唔會主動介入調查啦！

嗱，屋署官僚胡混度日，可能真係忘記咗邊啲權貴僭建獲得開恩放生，等太一叮提醒佢哋喇。個案一，前特首曾蔭權爵士被踢爆將開放式露台完全圍封；個案二，前政務司司長唐英年嘅九龍塘豪宅唔覺意「掘深咗」，二千呎「地下王宮」哄動一時；個案三，前食物及衞生局局長周一嶽同樣將寓所露台圍封成僭建空間；個案四……算啦，再數落去，隨時數到天光都似。試問港產官僚，高官權貴有樣學樣，僭建成風，當局有邊次唔係視若無睹，唔嗲唔吊呀？屋宇署話處理名人僭建個案時會按風險管理原則訂立優先次序。計太一叮話齋，港產官僚處理高官僭建個案時，係按官官相衞原則訂立優待次序就真！

上樑不正下樑歪，高官權貴其身不正，唔怪得僭建問題愈演愈烈喇。佢哋知法犯法吖嘛，有人咪有樣學樣囉，最大鑊嘅係，高官淪為僭建醜聞主角之後，居然仲可以大搖大擺，若無其事，所傳達嘅訊息就係當局有法不依，執法不嚴，咁搞法，香港想唔變「僭建之都」都難喇。

等太一叮再次提醒當局，法律面前，人人平等，違法就係違法，絕對不容姑息，權貴僭建就要執法，高官貪婪就要懲處，冇人情講，如果當局繼續包庇，香港「法治之都」招牌遲早畀人拆走都似，叮！