城中鏡：280両金米奇坐鎮吸客

足金米奇會擺喺周大福旗下尖沙咀iSQUARE分店內，足金米奇高達九十厘米，據周大福執董Peter孫志強講，呢隻米奇老鼠相當重磅，足足有二百八十両。

雖然Peter話「足金米奇」係非賣品而無定價，但以尋日店內每両飾金牌價約一萬三千二百元計，未計手工費都要三百六十九萬六千大元，所以「足金米奇」可以話係鎮店之寶。其實，周大福早喺一一年都試過斥資千萬元，打造足金小熊維尼雕像，同樣係非賣品，亦成功引來不少生意，因為有小熊維尼愛好者要求有樣學樣訂隻返屋企，size當然細好多啦。

作為迪士尼大中華區嘅獨家珠寶特許授權商，周大福特別趕喺新年前重金炮製迪士尼珠寶專區，區內同時展出鑲有二千粒鑽石嘅玻璃鞋，亦屬非賣品。但Peter透露，目前暫未考慮增加專區數目，需視乎各店舖面積而定。講到新年銷情，佢就話要睇金價走勢。