政壇：樹根四圍開炮亂咁辣
鍾樹根自從入咗立法會，經常爆出「金句」，佢尋日出席香港大學政政學會舉辦嘅《施政報告》論壇時，仲向左中右開炮添！
鍾樹根（左）出席論壇，向郭家麒（中）、李梓敬（右）連環發炮。
樹根認為今年《施政報告》扶貧力度大，特別係低收入在職家庭津貼，算係有一定長遠規劃。不過，公文袋嘅郭家麒就唱反調，話扶貧係政務司司長嘅政績，起樓都係畫餅充飢。而富貴黨青年主席李梓敬就批評《施政報告》向基層大派福利，對納稅人唔公平，將「蛇齋餅糉」發揚光大同制度化喎。
唔知係咪「蛇齋餅糉」呢個用詞辣着咗樹根，佢一邊開炮話「有人天生就係反對派，否則就肯定心理有問題，（對政府）咁灰心，會唔會自尋短見？」一邊又話有人隻眼淨係見到上層社會，對貧窮人視而不見。跟住佢再寸港台「大花筒」，話只係用三十億元、「唔使起建築物」就可以搞到低收入在職家庭津貼。最後佢連學生都唔放過，聲言普選冇篩選係烏托邦，「入嚟港大就係篩選啦！」
