立法會每逢周三大會，每位議員喺每次辯論時都可以提出修正案，其他議員又可以就議員修正案提出修正，你又修正我又修正，唔熟議事規則分分鐘唔知佢哋講乜。數口精嘅會計界代表梁繼昌早前建議，唔准議員就其他修正案提出修正，諮詢全體議員後，發現五十幾名議員支持建議，原來大家都唔想講咁多廢話，於是就咁成功爭取立法會「減廢」。

梁繼昌

入咗議會兩年未夠嘅梁繼昌，估唔到其新思維可衝擊到立會文化。議事規則委員會稍後會討論佢嘅建議，若建議獲通過，日後議員唔可以就其他議員修正案提出修正。佢話今次罕有獲泛民同建制派議員支持，相信建議好大機會通過，仲話第日辯論冇咁多修正案，議題簡單易明又清晰，議員唔會投錯票，記者唔會搞錯，公眾對立會事務興趣都大啲啦！

連立會主席曾鈺成都讚梁繼昌嘅建議唔錯，話立會辯論主要目的，係讓市民清楚知道議員立場。若禁止議員修正其他議員嘅修正案，既可加快辯論程序，公眾亦唔會因複雜字眼，令佢哋唔知道議員立場。

第一手消息請下載on.cc東網iPhone/iPad/Android/Windows Phone Apps