由泛民主派政團組成嘅真普選聯盟（真普聯）經常財政「乾塘」已係公開嘅秘密，據聞佢哋最近決定喺五月中舉行籌款晚宴籌錢，仲要筵開二十幾圍咁多。

設計圖片及對白

不過，佢哋暫時決定晚宴「買枱」只限聯盟成員，拍賣環節亦唔會公開畀街外人競投，但班成員過去咁孤寒唔肯科水，睇嚟佢哋嘅籌款大計隨時蝕揸米。

其實，真普聯喺早前元旦遊行前夕下令各泛民政團要上繳一成五捐款，引起部分靠遊行籌錢搵食嘅細政團不滿，更討價還價要求畀少啲。如今距離遊行已過咗一段時間，但仍有政團未肯「科水」，即使召集人鄭宇碩多番提醒，都仲係有人詐傻扮懵唔肯就範，搞到佢冇晒符。不過，真普聯下月將繼續搵港大進行第三次民意研究，調查市民對普選特首「三軌方案」同公民提名嘅支持度，預算額外用多八至十萬元。

開支咁大，真普聯於是積極「開源」搵多啲錢，佢哋喺前日召開例行會議，初步敲定會喺五月中舉行籌款晚宴，地點就選擇喺尖沙咀童軍總會附近一間酒樓，稍後會再開會擬訂具體細節。雖然真普聯好似其他晚宴咁設表演同拍賣環節，又呼籲各政團積極搵珍貴物品拍賣籌款，但初步計劃唔會倣效佔中秘書處大搞名人飯局容許街外人報名，淨係畀聯盟成員「買枱」後邀請嘉賓參與晚宴。

埋單隨時倒貼

真普聯只限自己人參加，即係等於「羊毛出自羊身上」，佢哋班聯盟成員過去已唔多願意上繳遊行街站籌得嘅款項，依家又搞晚宴揼自己人心口，如果到時反應冷淡又冇乜拍賣品，驚唔驚最終埋單要倒貼呢？

第一手消息請下載on.cc東網iPhone/iPad/Android/Windows Phone Apps