港台大樓減七億 掩人耳目玩數字

好嘞，港台新大樓撥款申請今個月底再闖關，當局究竟點樣「減磅」呢？嗱，減就係減嘞，不過係減咗等於冇減啫。當局尋日就港台新大樓減磅方案諮詢政黨意見，建造費只係減少七億元咁大把，而且全屬購置器材及應急等費用，完全冇削減主體工程費，咁都得？

正如立法會議員話齋，器材可以隨時添置，今日暫時唔買，第日可以再買番，屆時米已成炊咯，唔通立法會可以否決咩？唔通納稅人可以唔接受咩？港台打死狗講價，有恃無恐，想唔變無底深潭都難喇。所以話，當局表面削減造價，實際玩數字遊戲，何止係搵納稅人笨，直頭係裝個氹畀市民踩落去，豈有此理！

再講喇，港台新大樓就算明碼實價減磅七億，唔通咁就唔算大花筒吖？一盞爛燈賣一百蚊，同賣九十九蚊有乜分別吖？唔好唔記得，新大樓好多高昂開支根本冇必要，例如同一座大樓內，居然將電視及電台部門完全獨立運作，搞到消防、供電及通訊系統全部「打孖上」，咁搞法，納稅人多多錢都唔夠佢哋浪費喇。

不過咁，港台建新大樓揮金如土，太一叮都可以理解嘅。事關港台做慣敗家仔，浪費公帑劣迹斑斑，又點會顧住納稅人嘅血汗錢吖，新大樓唔好話減磅，冇進一步加磅都偷笑咯。講到尾，最抵鬧嘅係港府，平日對市民孤寒成性，刻薄寡恩，但對港台就有求必應，出手闊綽，港台今日淪為官場敗家仔，港府咪就係荒唐無能嘅昏君囉。

最好笑嘅係，人哋養狗可以看門口，而港府養肥港台，反而日日畀佢狂吠，簡直自食苦果。港府咁都未知驚，依家仲話要大灑金錢壯大港台，你話唔係被虐狂都冇人信喇。

一句講晒，減價七億仍敗家，港台大樓無底洞。今時今日，內地當局都要提倡節約，嚴格控制樓堂館所喇，反而港府仲係洗腳唔抹腳，真係令人難以置信。嗱，既然港府靠唔住，立法會議員更加要睇緊啲，一定要好好把關，唔好畀敗家仔將納稅人啲錢敗晒吖，叮！