整整一個星期，足七日，天天都有人致電電台phone-in節目大吐苦水，吖！唔係吐苦水，而係媽媽有聲，怨氣沖天！呢班人係香港特區內的最受害、最無助、最可憐的一群夾心人，即有份交稅，卻無福利可享的中產。

人氣旺爆嘅「未來特首」林鄭爭先恐後出嚟大嗌扶貧扶貧，尤其是她主理的「築福香港」繞過立法會，自行決定向低收入家庭狂派福利，包括令佢哋可以免費睇賀歲波，及招待單親家庭坐飛機，甚至往外遊學，佢話確保香港窮弱群族有平等機會享以中產（甚至富貴人家）的家庭生活喎！

有個中產中下層的聽眾透過大氣電波「泣訴」苦況。佢同老婆每月合共賺取約五萬大元，有兩個孩子和兩家父母要供養，一直無法儲到首期置業，現住大角咀舊區，也須近萬元租金。因要讓太太外出工作，便花三、四千元請菲傭（又要養多個人）。

兩公婆返工車資加午膳，每月，無一皮嘢，咪使旨意落樓；兩孩子，一個中三、一個小六，又去咗幾千；四個老人家各人千五，亦唔見咗六千；每月剩低的唔夠一萬，除家用食膳水電煤之外，仲要供強積金和交稅！所以全家人千祈咪傷風鼻塞呀！佢哋另有憂慮，就係咁「生存」落去，到退休都無儲蓄，到時無錢無能力工作，依家又因「高薪」不符合公屋申請，到時除全家踎街，便別無他選也！

不過，一批全無任何貢獻過香港的內地新移民，一到埗就能伸大手板住食無憂，怎叫本土努力一生的香港人唔過火屎吖？但香港廢柴政府最高層卻只顧為自己民望加分，狂fing港人儲備，話之你死，無視香港沉淪！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps