「遵旨！」香城高官剛齊聲答應上國來使宣詔，轉眼就交頭接耳，商討如何貫徹落實緊跟推進。「聖上話不簡單倣效濠江，即係倣效定唔倣效呢？」高官A頭痕問。高官B自恃朝中有人，成竹在胸地說：「枉你咬皇糧咁耐，咁都唔知？聖上講到出聲，當然係叫你倣效啦！」

高官C冷笑一聲，心諗難道得你高官B泊碼頭？便諷刺說：「你朝中嗰位係喺秦城收嘅料呀？倣效？睇過『拾柒．伍』計劃都知，香江唔同濠江，一早虧咗啦！」

「虧？」AB齊問。

「你哋真係唔曉國情！」高官C續發議論：「規劃個規呀！家陣講不簡單倣效，就係要叫我哋問清楚簡唔簡單先，即係香江高官唔使再做規佬喇！」

二人如夢初醒，A急不及待問：「咁港大咪要學澳門大學咁，搬去蛇口？港交所可以正式改名做娛樂場？」

「唓，山寨中大都喺深圳落咗戶啦！港股仲刺激過百家樂啦！」高官C面帶鄙夷回道。唯獨高官B大笑不止，餘下二人疑惑地注視他。

「妖，仲講呢啲？」高官B掏出手機低頭道：「家陣我哋齋人工唔使做喇，仲唔叫埋老婆仔女去大堡礁度個靚假？」

第一手消息請下載on.cc東網iPhone/iPad/Android/Windows Phone Apps