城中鏡：基金教父舉家助籌款
「基金教父」David雷賢達近年熱衷探訪各區中學，親自向低下階層嘅同學仔宣揚「知識改變命運」道理，其中佢就特別同大澳筏可中學有緣分。早兩日David更大搞慈善電影活動，據聞慈善票價最平五百蚊，最貴嗰張更要二十萬，希望幫學校籌得逾一百萬款項，等學校可以增加教學設備。須知道David乃金融界嘅「教父級」人馬，以佢嘅廣闊人脈，難怪慈善電影活動當晚邀得不少猛人捧場喇！
雷賢達同雷太（左二及一）、與仔仔Brian（右一）全家出動幫筏可中學籌款。
不過，當晚最耀眼嘅唔係啲嘉賓，而係一直無限量支持David做善事嘅雷太同仔仔Brian。記得當晚David忙住派發卡通片《渣斯汀大任務》戲飛予嘉賓，而雷太同Brian就幫佢招呼朋友入場、安排座位等，一家人分工合作，足見默契，最後呢招「全家出動做慈善」果然大成功，因為校方公布成功籌得一百萬，David開心到見牙唔見眼，仲話未來一定會繼續支持弱勢社群喎！
