城中鏡：港交所照派千元利是

聽聞港交所依家仲未去銀行「唱錢」派利是，所以未知「金牛」利是係兩張五百定係一張一千元，但照睇港交所一向重視「風險管理」，派出嘅「千元」利是一定係經銀行兌換，肯定係真嘢，抽中大利是嘅出市員應該唔使擔心。

港交所派畀出市員嘅利是今年唔會「加碼」，照舊係十封一千元、二十封五百元同大部分五十元。不過，由於出市員「沒有最少，只有更少」，由往時一百個變得番五、六十個左右，喺「僧少粥多」情況下，抽中大利是嘅機會自然增加。

計計數，假設年初五開市日，有唔少出市員去湊熱鬧，當有一百個出市員出席，但共有三十封特別版利是，抽中機會分分鐘易過依家啲熱爆新股。記得年前就試過有出市員連續收到兩封大利是，笑到見牙唔見眼。啲經紀最講意頭，新年流流就連中兩次，嗰年仲唔發過豬頭！