城市大學尋日舉行三十周年校慶活動啟動禮,近五百名校董同校友聚集喺新落成嘅學術樓慶祝,包括合和實業主席「哥頓」胡應湘、校董會主席胡曉明、城大副監督梁乃鵬及校長郭位等,非常熱鬧。一眾校董同校長喺啟動儀式後,仲不停畀班校友捉住影相,分身不暇。跟住仲發現原來北京殘奧會馬術比賽香港選手葉少康同香港社會創投基金創辦人魏華星都在場,二人都係城大校友,開心聚首一堂。

城大舉辦三十周年校慶活動啟動禮,一班校董同學生一齊切蛋糕慶祝。

葉少康(左)同魏華星都認為母校充滿人情味。

城大嚟緊會有一連串慶祝活動,包括校慶晚宴、校友日、國際會議、講座同可持續發展高峰會等。哥頓話好開心見到校園走向國際化,仲讚學校嘅運作方式日益環保。對於近日成立獸醫學院嘅問題,胡曉明話其實唔係事在必行,但依家所有大學都有教學自主,學校會繼續向呢個方向發展,會自資搞研究生課程同做相關嘅研究。

暢談校園生活點滴

葉少康同魏華星原來以前都曾就讀城大工商數量分析文學,而講起昔日喺城大生活嘅點點滴滴,佢哋異口同聲話印象最深刻就係學校嘅「人情味」,直到依家,佢哋依然經常與學校職員或同學聯絡。不過,佢哋就話當時嘅校舍細好多,冇依家咁大喎!

葉少康話依家嘅大學生好多時會將自己嘅缺點同人哋優點比較,但其實每個人能力都有限,應該要學識搵一樣自己自豪嘅專長發展,好似佢咁就揀咗策騎。

第一手消息請下載on.cc東網iPhone/iPad/Android/Windows Phone Apps