政壇：搞搞政：引緬傭輸港 鍾國斌孭重飛

近年往緬甸經商、變咗半個「緬甸通」嘅立法會紡織及製衣界議員Felix鍾國斌，今個周末又會飛去緬甸傾港商工業園一事。不過，今次佢仲有另一重任，就係同緬甸勞工部部長傾輸入外傭議題。Felix話港府已開晒綠燈，依家等待緬甸政府批准，如果成事，初步估計緬甸最少可提供二萬個緬傭來港打工。

Felix話舊年有中介公司請咗百幾個緬傭來港試工，發現效果唔錯，緬甸人聽話又好使，唯獨係唔夠現代化，要學吓點用電器。今次佢同緬甸勞工部部長主要傾細節，一旦成事就好囉，港人僱主又多個選擇。

其實今次佢係去緬甸簽約，緬甸政府承諾撥四十萬平方米工業園畀港商，租用權有五十年咁耐，租金平到笑。佢透露，現時已有機構認頭到當地設廠，因為當地人工大約係一百美元（七百八十港元）一個月，平過孟加拉、越南多多聲，揚言緬甸好大機會做世界工廠。