政壇：養和開東區分院遇阻滯

身兼東區區議員嘅立法會議員鍾樹根話，最近收到唔少街坊投訴，話好擔心養和分院會有輻射洩漏，又話起咗先挽救就太遲喇。佢話筲箕灣阿公岩道有學校又有民居，一旦發生輻射洩漏，後果不堪設想，今日佢會落區收集街坊簽名，希望養和盡快向市民解釋有冇輻射影響，如果喺未有清晰解釋前，希望城規會唔好通過有關計劃喎！

據聞養和已向城規會提交環境評估報告，講明院方會做足安全措施，例如質子治療室嘅牆身、天花、地板等物料都會特別加厚，確保殘餘輻射水平符合香港法例同國際水平。

我哋就此向養和醫院查詢，院方話質子治療原理主要利用氫氣作原料，唔係核設施。雖然質子儀器的確產生輻射，但據目前評估，輻射量屬安全水平，一年產生輻射量仲少過香港來回紐約搭飛機嘅輻射量。