相信大家仲記得特首梁振英早前出席施政報告地區論壇時，遇上激進示威者掟生雞蛋，但最後誤中副車擊中坐喺旁邊嘅財爺鬍鬚曾，搞到佢成件運動外套都係蛋汁，異常狼狽。

鬍鬚曾近日同傳媒提起呢件瘀事時，自爆件外套到依家都仲未洗！皆因件外套一早就被警方收起咗，作為將來可能起訴有關示威者嘅呈堂證據。佢自言就算警方將來畀番件衫佢，肯定臭晒着唔番，睇嚟又要破財。

不過，佢話其實已算好彩，首先當日上午佢去咗玩西洋劍，唔夠時間返屋企換件靚西裝出席論壇，否則損失仲大。

喺美國讀書嘅鬍鬚曾又笑言，香港啲細路唔興玩棒球，掟嘢都唔識得發力，如果同樣事件發生喺美國，佢隨時會被啲棒球好手掟到入醫院都似。佢咁講法，係咪諷刺香港嘅示威者未夠班呢？

第一手消息請下載on.cc東網iPhone/iPad/Android/Windows Phone Apps