近期先後有報章媒體聲稱被多間大客戶抽廣告，一時話唔見幾多錢，一時又話因為編採立場而被抽廣告，點知近日仲扯到特首CY梁振英頭上，話CY為針對一度冇配合抽廣告嘅渣打銀行，所以決定缺席二月渣打馬拉松嘅起步禮。CY尋日就親自解畫，話二月初、農曆新年期間會休假十日，工作日數特別少，所以改派負責本港體育事務嘅民政事務局局長曾德成主持起步禮都好恰當。

CY喺農曆新年期間休假十日，因而缺席馬拉松起步禮同鄉議局團拜。

CY又話政府每日都收到好多出席活動嘅邀請，如果係咪都去就冇時間出席新嘅活動。咁講又好啱喎，好似立法會議員梁國雄話齋，唔通好似「貪曾」前特首曾蔭權爵士在任時咁，因為胞妹係渣打高層，年年都仆到去主持起步禮咩！除咗馬拉松起步禮外，有鄉紳又話CY連鄉議局每年農曆年初七舉行嘅新春團拜都打算甩底，質疑佢怕面對鄉紳示威喎。原來都只係一場誤會，因為團拜咁啱都撞正CY休假啫！

第一手消息請下載on.cc東網iPhone/iPad/Android/Windows Phone Apps