政壇：德成局長象哥連唔到線
話說民政事務局局長曾德成尋日開完立法會會議後，離開之際撞到立法會議員「象哥」黃定光，寒暄一番後，曾德成突然九唔搭八問象哥「『對沖』嗰度你幫邊面o架？」搞到象哥一臉惘然，唔知德成局長講乜。原來曾德成係幫財經事務及庫務局局長陳家強同勞工及福利局局長張建宗，追問象哥究竟喺取消強積金對沖機制議題上幫邊面，認真冇解。
曾德成（左）追問黃定光對取消強積金對沖機制嘅立場，但語焉不詳。
象哥聽到「對沖」一時醒唔起講緊強積金對沖機制，仲反問曾德成「咩幫邊面？」曾德成先解畫話：「你老婆（林淑儀）工聯會（會長）o架嘛！」但未等象哥回應，曾德成已經絕塵而去。
象哥事後透露，佢同太太返到屋企就唔講公事o架喇，總之佢作為進出口界議員兼中華出入口商會榮譽會長，佢有佢撐資方立場，太太就繼續撐勞工，但都無傷兩口子感情。
