政壇：「積犯」田二少又遲到
立法會前日早上八點半鐘舉行嘅房屋事務委員會會議，最後因喺法定嘅開會時間十五分鐘內，都未夠過半數議員出席，最終搞到流會收場，當然遲到同缺席嘅議員要齊齊孭鑊啦！咁啱尋日早上八點半又舉行工務小組委員會會議，正係測試班議員有冇吸取教訓嘅好時機。點知流會「積犯」之一嘅新民黨「田二少」田北辰繼續過晒開會時間先到場，仲施施然行入會議室。又再遲到，莫非佢仍不知悔改，想「積犯」變「重」犯？
設計圖片
施施然到場冇悔意
尋日同樣喺早上八點半舉行嘅工務小組委員會會議，未夠鐘開會就坐夠晒人，其中流會「積犯」張超雄，同前一日話睇錯時間嘅梁志祥都好準時，乖乖咁坐咗喺會議室入面。所以時間未到，會議室內已坐滿十幾人，似乎大家都知錯能改喎！
不過，前一日有份造就流會嘅田二少繼續遲大到，仲遲足半個鐘先施施然行入會議室，莫非佢唔怕被選民怪責？田二少回應話，原來佢一早就到咗立法會，只係喺樓下停車場講緊電話，之後就知夠人開會，所以咪繼續講埋個電話先囉。至於前一日，佢就係喺區內處理緊居民投訴，趕唔切返立法會開會。不過，如果再一次同類事情發生，佢話一定會打畀秘書處主動通知情況。
其實，除咗田二少外，范國威、黃碧雲、梁家騮等都係遲到分子，雖然話冬天天氣凍，晨早未天光又要起身開會有啲陰功，但身為公職人員，太懶散就唔係咁好啦。睇嚟立法會以後除咗喺每屆會期開始時，帶啲議員參觀大樓，上開會程序課程外，仲要好好教授時間觀念囉！
