善有善報，惡有惡報，惡僱主涉嫌地獄式虐待印傭，終於極速被捕。港產官僚平日做嘢懶懶散散，點解今次咁快手呢？無他嘅，虐傭案搞到香港臭名遠揚，如果當局唔犂庭掃穴拉人封艇，點向外界展示決心呀？

諷刺嘅係，當局對一宗虐傭案件可以咁上心，話行動就行動，話拉人就拉人，但係對摧毀香港廉潔形象嘅高官貪腐案件卻闊佬懶理，唔嗲唔吊，你話係咪豈有此理吖。嗱，前廉政專員湯顯明貪腐成性，惡名昭彰，現任廉政專員白韞六尋日再度回應事件，居然話廉署聲譽雖然受打擊，「可幸係個別事件」喎，仲話香港整體貪污情況無惡化添，簡直九唔搭八！

高官貪腐點會係個別事件呀？除咗貪湯，仲有貪腐醜聞纏身嘅前特首曾蔭權爵士，仲有已被起訴嘅有前政務司司長許仕仁，特衰政府簡直貪官輩出，至於仍潛水未曝光嘅貪官有幾多，只有天知道。

話香港貪污情況無惡化喎，唔好講七百萬港人唔信，國際社會都唔信喇。事實上，美國傳統基金會及《華爾街日報》日前發表「全球經濟自由度指數」，香港雖然連續二十年蟬聯全球最自由經濟體，但被排名第二嘅新加坡進一步追貼，僅僅領先零點七分咋，原因又係香港嘅廉潔指數急跌。白韞六唔去雷厲風行捉貪，還香港廉潔清譽，反而對問題輕描淡寫，自我安慰，呢種麻木不仁嘅官腔出自廉署一哥之口，點止可恨，簡直就係不幸！

一言驚醒夢中人，唔怪得廉署查貪曾查咗將近兩年，依然查到無影無蹤，無晒下文喇，既然官員貪腐只係個別事件咯喎，辦案梗係慢條斯理，懶懶閒閒喇。正如立法會議員質疑，白韞六對湯顯明事件輕輕帶過、輕輕放下，根本無展現撥亂反正嘅決心，令市民相信廉署。

講到呢度，太一叮實在為廉署難過。廉署自成立以來，一直致力打老虎，「香港勝在有ICAC」嘅口號得來不易，點知家陣為咗一對貪腐「曾兄弟」，搞到英名盡喪，晚節不保。喂，內地都鐵腕肅貪喇，舊年打掉幾十隻大老虎，「刑不上常委」嘅天條都可能打破埋添。如果廉署懲貪手軟腳軟唔嗲唔吊，香港嘅反腐工作咪仲差過內地？內地唔反腐會「亡黨亡國」，計太一叮話齋，廉署唔捉貪隨時會「亡港」吖。

一句講晒，絕代雙貪一日未繩之以法，香港已經蒙污嘅廉政招牌就一日無法洗白白。廉署查貪曾貪湯唔好再軟手軟腳嘞，繼續任由貪官周街走，白韞六唔覺得醜，市民都戥你哋醜吖，叮！

第一手消息請下載on.cc東網iPhone/iPad/Android/Windows Phone Apps