城中鏡：阿里繳逾70億稅馬雲感驕傲
阿里巴巴集團呢兩年紅透半邊天，主席馬雲話舊年發生好多事，都令佢自豪同驕傲，其中一樣係佢哋舊年交咗超過七十億元（人民幣．下同）稅款。交得稅多，證明賺得多，抵佢開心嘅。
馬雲對員工好闊綽，樂意派發「大利是」。
馬雲視納稅為必然嘅義務，回饋社會成為佢善待同胞不容遲疑嘅任務。舊年阿里納稅總額超過七十億元，面對納稅額驚人，馬雲反而認為係令佢驕傲嘅事。馬雲不但視繳納巨額稅項是理所當然，佢對旗下員工都好闊綽，樂意為員工派發「大利是」，喺呢個財政年度完結時，亦即今年三月底，阿里會對員工發放第十三個月月薪，又會有特殊紅包，咁好待遇，唔怪得員工都樂意做一個「阿里人」。
巨額稅項當然係來自集團龐大嘅收益，好似舊年推出創新性互聯網金融產品餘額寶，總額逾二千五百億元；舊年尾嘅「光棍節」，淘寶平台瘋狂購物，單日錄得超過三百五十億總支付寶成交額，震驚中外。另外，阿里雲計算亦成為中國最大嘅雲平台之一，更係世界上第一個能夠對外提供5K雲計算服務的公司。咁多好嘢，馬雲都係揀交稅令佢自豪，證明佢都好豁達。
