SUN搞作：打橫嚟講：「大陸化」後，問題點會斷尾！
旺角西洋菜街自二○○○年起闢為行人專用區，原意本是在稠密喧嘩的鬧市，騰出一片閒靜小地帶，讓居民於煩囂勞慮的濁世，有一處信步憩息的樂土，點知，呢個計劃好哋哋的實施咗不足十年後，這兩三年之嘛！便被「大陸化」狠狠摧毀。
若果，唔係一大批內地豪客挾大量現金來港狂fing，這條行人專用區便不會引來大棚自詡「藝術家」的賣藝小販晚晚喺度開壇等人「捐助」；若非好好搵，亦唔會令另一群「非藝術家」嚟埋爭先霸位搵食，包括睇相佬、少林假和尚、露肉o靚模、塔羅牌神婆、火燒毀容斷臂殘缺失明歌手、口含毛筆寫字書法家、踢碗失手雜技大師，和一班精神異常興奮的耆英狂舞派……日日開P、晚晚陪/嘈住你！
話「大陸化」，除上述一等中國幻海奇情式的異能人士外，仲有佢哋顯露的中國大陸人特性，強國人意識，只許自己成功，不理人家慘痛。從不自律、只有自私，擺檔歌唱家們，總開盡喇叭互鬥大聲爭生意；無喇叭的，就爭霸面積大，即影即有相片檔便是好似老奉掗晒成條街……仲未計電訊商的易拉架。
昨天，西洋菜街打回原形，取消行人專用時段，准許汽車行駛。警方、食環署和路政等部門煞有介事的重兵出動，是十三年來首次咁大龍鳳，連平日一早開工set up易拉架嘅「社團」工友，亦畀足面放假一天（邊個放風畀呢班陀地集團嘅呢？），條街平靜晒，加上車輛駛入的不多，行人如常行出馬路，跟十多年前開頭那般愉快。
嗱，咪畀我批中，香港廢柴政府喺呢頭幾日，作狀做吓嘢之後，好快，呢度又亂過亂葬崗的了！立此存照！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
