少膽虫身任腦腫一職，除咗要處理《爛果》一切大小事務，最重要嘅當然係應付腦細淫賤黎，係就係惡頂啲，不過份糧包埋，無計。今日少膽虫又要履行「職務」，喺腦細房受靶。

「少膽虫！」淫賤黎又嗌到鬼殺咁嘈︰「點解《爛果》今年又蝕錢？你點做腦腫？」日日賣剩幾十萬份，唔蝕就有鬼，好在少膽虫識語言偽術︰「腦細你睇真啲先，全靠我下令減《爛果》印數，今年蝕少過上年好多！」點知淫賤黎聽完塊面再黑啲︰「你睇人哋鬍鬚曾要使多成百億，都仲拍心口話可以年年有餘，你就蝕少當賺！」

「點同呢？嗰啲守財奴就梗係可以年年有餘喇！但腦細你對班細嘅咁好，蝕到入肉都只係炒一半人，想有錢剩係難少少嘅。」少膽虫把握機會擦鞋兼獻計︰「不過只要《爛果》再印少啲、人手再減啲、班細嘅花紅再扣起啲，咁就實轉虧為盈喇！」淫賤黎笑逐顏開︰「好計！少膽虫真抵錫！快啲埋嚟畀我啜啖先！」腦細房又傳出大家熟悉嘅慘叫聲。

第一手消息請下載on.cc東網iPhone/iPad/Android/Windows Phone Apps