政壇：紅魔鬼在港招兵吸人仔

睇過份招聘廣告嘅要求，結論係你唔一定要識踢波，識做市場研究就得！曼聯香港辦公室，要請全職研究分析員（Research Analyst），雖然只得三個月合約，但就講明表現好嘅話，有機會轉做長工。呢個職位主要發掘亞太區業務嘅商機，負責寫行業環境同分析報告、建立數據庫同研究流程咁。

公司要求應徵者大學畢業，最好主修工商管理、分析力好、懂英語及亞洲語言等。

瞄準中國球迷荷包

曼聯呢排表現一般，唔緊要，最重要係對住中國球迷個荷包瞄得好準就得喇，好多中外分析都話，大陸人依然係消費品市場嘅樁柱，喺香港就最容易吸佢地啲金，其實，所謂發掘亞太區業務商機，咪即係賺人仔囉！話唔埋香港會愈嚟愈多紅噹噹嘅精品店、Cafe。

內地傳媒去年底傳出曼聯頻頻接洽多間大型遊戲商，向佢哋發出邀請函，好大機會要搵個官方社交遊戲合作夥伴，消息一出即時炒起多隻網遊股。今次仲喺香港請埋分析員，睇嚟好認真搵錢喎，之不過，搵錢還搵錢，佢哋都要踢好啲波，唔好令全球有六億幾個「紅魔鬼」粉絲失望，轉捧其他隊。