政壇：見過鬼怕黑波波早「申利」
發展局局長「波波」陳茂波上任後，四圍都係火頭，嚟緊又要研究搞新界北新發展區同東涌新市鎮擴展等計劃。佢尋日接受電台訪問時，被問到自己同家人喺呢啲地方有冇權益要申報，即刻大大聲話，自己絕對冇，至於太太許步明啲資產喇喎，就話以佢所知，太太都冇乜權益。唔係啩？唔通仲有料爆？波波就即刻補鑊，更正話太太都冇利益衝突。咁其他「家人」呢？佢就冇講喇！
陳茂波申報喺新界冇權益。（資料圖片）
記得波波啱啱上任就被爆太太持有股份嘅公司物業經營劏房，到發展新界東北嗰陣，再爆太太持有另一間公司擁有新界東北多幅農地，結果搞到一鑊泡，令佢做埋民望最低嘅局長，唔知佢係咪見過鬼怕黑，所以要盡早申報呢？
