有機構搞咗個商界最關注嘅十件大事評選活動，財爺「鬍鬚曾」曾俊華尋日出席活動頒獎禮時，話自己最難忘係舊年立法會就佢發表嘅財政預算案拉布，仲話要多謝立法會主席曾鈺成幫手剪布，令到政府同公共服務嘅運作冇受到影響。但有議員已揚言唔排除今年再拉布，佢今次有冇咁好彩呢？

曾俊華最難忘係舊年立法會就財政預算案拉布。

上星期政府公布嘅施政報告話會設立創新科技局，已經有議員揚言會用盡一切方法反對，仲唔排除會拉布。鬍鬚曾就話希望今年唔好再拉布喇，大家減少啲政治角力、多做實務咁話。係咪如佢所願，就要放長雙眼睇喇！

第一手消息請下載on.cc東網iPhone/iPad/Android/Windows Phone Apps