政壇：譚志源解畫變打雜
政制及內地事務局尋日就施政報告向立法會政制事務委員會作出匯報，班議員主要關心政改問題，例如何秀蘭就話清華大學法學院院長王振民日前提出要維護精英提名，要求當局表態，但局長譚志源就以一句「好慘」作回應。不過，何秀蘭嘅問題點都唔及李卓人同劉慧卿嘅問題咁難答，皆因佢哋竟然問啲唔係政制局工作範疇嘅問題。
設計圖片及對白
尷尬笑容回應
阿人會上引述行政會議成員羅范椒芬日前言論，話如果政策研究等同已落實政綱，咁政府以後乜嘢政策都唔使做。佢又以強積金對沖機制為例，問譚志源以後係咪都會將研究同落實扯上關係。之後發言嘅卿姐先係鬧爆施政報告對行政立法關係隻字不提，又話政府淨係識得向區議會派錢，唔肯下放權力畀地區民政事務專員，令政府多年來都唔可以培訓政治人才。
譚志源此時面露尷尬笑容，話行政立法範疇係由政務司司長負責，而地區行政事務屬於民政事務局施政範疇。講白啲，啲議員問到離行離列，一係搞錯對象，一係當譚志源係打雜。
至於工業界林大輝嘅發言就正路啲，大讚「政改三人組」有台型夠官威，但政改一役成亦「三人組」，敗亦「三人組」，事關政府唔肯表明「公民提名」係咪違反《基本法》，令人感覺佢哋係「假開明」喎。譚志源重申，政府現階段唔會就任何方案表達意見，又寸爆大輝唔好讚政府咁多，因為大輝嘅說話「又有沙糖又有咩」。
譚志源喺會後話，期望政改第一輪諮詢完成後，用大約兩個月時間歸納意見，再喺今年七月向特首梁振英提交報告，並爭取喺今年第四季至明年初向立法會提交政改具體方案。佢話如果第一輪諮詢已可收窄民間分歧，第二輪諮詢就可以用少啲時間。不過，暫時睇嚟冇乜可能，因為當局只係收到少量民間意見。
