庸官累人累物 港府有眼無珠
開講有話，唔怕生壞命，最怕改錯名，前食衞局局長周一嶽有個花名叫周一鑊，真係一啲都冇改錯。佢做食衞局局長時渾渾噩噩一周一鑊，依家拍拍屁股走去做平機會主席，留低隻公共醫療爛鑊，依然係醜聞滾滾而來，民怨滔滔不絕。
唔係太一叮隨口噏o架。呢，前中大整形外科教授博昂志早前爆料，指威爾斯親王醫院無為馬尼拉人質事件傷者易小玲提供適切治療，皆因周一嶽探病時話佢兩星期內唔使再做手術。「東方報業民意調查」顯示，超過九成人認為周一嶽涉嫌濫權影響醫療決定，信口開河不負責任，做騷探病反而害咗病人。
不過公道講句，周一嶽無能兼無腦、累人又累物，搞到公立醫院烏煙瘴氣，事故不絕，受害嘅又點只易小玲吖？正如民調指出，近五成市民認為「玩殘小玲」事件好似一塊放大鏡，向公眾展示醫療亂象叢生，病人福祉被犧牲嘅慘況；兩成一批評長官意志凌駕病人利益；另有兩成半質疑公立醫院變成揣摩上意嘅擦鞋機構。超過九成人明言，今次事件唔止令香港丟架，而且動搖市民對本港醫療嘅信任，對行業形象造成全面傷害。
公共醫療百病生，救人不成反害人。講番博昂志爆料單嘢，本身亦係一齣醫療鬧劇：堂堂專業醫生同醫院高層公開對罵，你話佢唔啱，佢話你唔着，好似潑婦罵街咁，連同「名醫封刀門」醜聞，公立醫院可以話係家醜不斷。公院管理一塌糊塗，唔係集中精力醫治病人，而係全副心機搞內鬥，你話病人條命係咪凍過水吖，叮！
諷刺嘅係，香港公共醫療沉淪不止，病人同醫生都係受害者，唯一受惠嘅居然係台灣。呢，易小玲喺香港做三十三次手術仍無法復原，去台灣做一次手術就重獲新生，當地主診醫生事後咁樣解釋：「高官干預治療，台灣絕不發生」，短短一句話，講出台勝港敗嘅關鍵。
太陽報愛心基金同東方日報慈善基金前幾年資助患先天性肺部發育不全綜合症嘅小茵茵前往台灣求醫，最近為患先天性心臟病嘅小謙謙籌款，亦係計劃去台灣接受手術。無他，咪因為香港醫療太不濟咯，正如民調顯示，對香港醫療體系仍有信心嘅市民只得四個巴仙咁大把。
一嶽禍港，遺患無窮，佢任內八年最大嘅政績就係令香港醫療變成世界笑話。而最最最好笑嘅係，呢件百無一用嘅前朝毒電池竟然獲當局委任為平機會主席，繼續發揮餘毒。正如民調顯示，四成九受訪者批評港府用人不當；兩成五質疑當局無決心撥亂反正；一成九批評庸官毋須受罰卻獲委任，顛三倒四。你話港府民望低落係咪攞來衰呢？
