香港的亂象，仲亂過「亂世佳人」，由民生慌張無王管，轉到法治不彰，無法無天後，再嚟，又賴政治糾紛，加庸官廢柴低能無道所致；今日，竟辣着埋經濟，嗱！唔係話「佔中」提早發難，攪亂中環金融運作呀！而係……

香港垃圾政府高層內訌鬼打鬼，爭住行頭狂派着數畀低下階層，用香港納稅人積累多年的公帑儲備收買人心，抬高自己下沉的民望，但要使幾多錢呢？財爺鬍鬚曾話：「支出大約超過往年二百億元啦！」但不消半日，等緊上位的現任政務司司長林鄭則反駁：「唔係二百億，估計，可能係一百億啫！」哦！就當一百億啦！點解政府最高層出嚟公布如斯重大報告前，無計過、傾過、磨合過，有共識至講嘅咩？喂！一百億差額呀！玩泥沙呀！

那個負責財經及庫務嘅傻強陳家強局長仲低B到話「一百億」同「二百億」的兩個講法都係啱嗰喎！各位看官，你哋話喇！佢係唔係白癡？睇見呢件庸廢垃圾，係咪火都嚟埋吖？

講番轉頭，咁！究竟香港每年要「使大」幾多呀？大佬！點解，一個政府會有咁多唔同嘅講法？銀碼會有咁大嘅出入？足一倍喎！又究竟，係邊個粉皮搞出呢鑊大頭佛出嚟呢？應否拉去犬決餵狗呢？

傳統香港人從不怕窮，更曾經愛心爆棚。看五十年代，中國大饑荒；六七十年代文化大革命；九十年代大水災，哪一次不是香港人籌集萬金抬入大陸救急扶危的呢？

今天，本土香港人不滿的，係政府最高層假借扶貧助弱的偽術，實為私利，互爭邀功，當香港人白癡、睇唔明，任由宰割，這才是不得人心，社會動亂之始也！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps