SUN搞作：少膽虫手記：廢紙有價
為咗彰顯腦腫嘅崇高地位，少膽虫返工至少遲一粒鐘，今日難得心情靚，就索性返半日。點知少膽虫一踏入office，就畀兩個大隻佬撳實喺地，少膽虫本能大叫︰「點錯相呀！我唔係少膽虫呀！」
驚魂未定，耳邊突然傳來一把既熟悉又惡心嘅聲音︰「少膽虫，你真沙膽！」果然係淫賤黎。少膽虫大惑不解︰「腦細，遲到啫！唔使又拉又鎖呀？」「仲扮嘢？你穿櫃桶底單嘢已經通晒天！」淫賤黎怒吼︰「前排新聞話康文署圖書當廢紙，每公斤賣到成七毫。《爛果》日日賣剩萬幾噸，我一毫子都無收過，仲唔係你落咗格？」
少膽虫即時呼冤︰「冤枉呀！壹全霉連紙都係霉，啲回收商唔肯收咋！」點知淫賤黎聽完仲火滾︰「狡辯！人嚟，用刑！」話音未落，就見肥豪攞咗碌棒球棍出嚟，少膽虫嚇到面都青埋︰「你、你想點呀？」淫賤黎笑淫淫咁話︰「穿人櫃者人亦通其櫃，同我通爆佢！」肥豪應聲動手，少膽虫痛到入心︰「唔、唔好……嗚呀！」眼見自己個櫃畀肥豪一棍捅穿，珍藏女星閃卡散滿一地，少膽虫完全崩潰，忍唔住淚灑當場。
