政壇：葉劉同陳智思或擦出火花
近日新民黨銳意同新界東地區勢力公民力量「談婚論嫁」，主席葉劉淑儀為求壯大勢力，近日連美國大學都唔放過，原來佢上星期二同着重博雅教育嘅波莫納學院（Pomona College）商談同匯賢智庫合作計劃，香港知名校友、行會成員陳智思都列席，呢兩名疑似來屆特首參選人一齊合作，唔知會唔會擦出乜嘢火花呢？
葉劉淑儀（左三）同波莫納學院成員同校董陳智思（右三）喺立法會會面。
葉劉早幾日喺facebook帳戶上載咗張佢、波莫納學院成員同埋校董陳智思嘅合照，佢話會上雙方傾到以匯賢智庫為平台，邀請該校學者來港演講，介紹民主理論、科技發展同埋西方各類學術同理論等，教授亦可以來港，到匯賢智庫學苑教授東亞文化、西方歷史等暑期班，進行關於教育議題嘅研究項目。
佢又歡迎該校學生來港到匯賢智庫或新民黨實習，或者新民黨挑選年輕人到學院做交流生，話呢次會面有益及有建設性，仲有好多交流機會。
