政壇：莫乃光行山證空氣質素差
立法會資訊科技界Charles莫乃光每星期都會去唔同地方行山，但佢尋日一如既往同朋友去畢架山登高，但就發現本港空氣污染非常嚴重，山上觀景台乜嘢景色都望唔到。佢話香港空氣本來已經好差，近兩星期行山時發現情況愈嚟愈嚴重，就算行到上山頂都唔可以遠眺到一百米外嘅景色，有啲可惜。
莫乃光尋日去畢架山登高，但喺山上望落去淨係望到一片白茫茫。（受訪者提供）
Charles話九龍區能見度一向都較其他地方為低，不過由於麥理浩徑第五段唔算難行，加上行完山可以去九龍城食甜品，所以尋日就去咗嗰度行山。
佢話後生仔鍾意落山多過上山，但佢同朋友就覺得上山比落山舒服，事關自己年紀大機器壞，落山時一對膝頭哥會呼呼作痛，佢行咗上山就唔想落番山。
