政壇：卓永興助女傭慢三拍
印傭Erwiana涉嫌被僱主欠薪，仲要被虐打至不似人形，直至佢做唔到嘢，僱主上個禮拜送佢返去印尼，先揭發呢單驚世奇案。件事呢幾日發酵落去，真係「醜事傳千里」，外國傳媒都報道話香港印傭係「現代奴隸」。港府嚴陣以待，勞工及福利局局長張建宗同保安局局長黎棟國都表明會嚴肅處理，仲即刻派員去印尼搜證，之不過咁多個官員，搵極都唔見勞工處處長卓永興出嚟講番句公道說話，如果打工仔女靠佢維護勞工權益，就真係死得喇！
設計圖片及對白
外傭同本港僱主有勞資糾紛就經常都有，但被僱主虐打至此，就真係前無古人，所以警方今日都要派員去印尼同Erwiana落口供。呢件事除咗傷人外，仲有欠薪，好明顯同勞工處有關。之不過，咁多日以嚟，都唔見卓永興蒲頭，反而佢上司張建宗就三日唔埋兩日都有回應，尋日話高度關注事件，又會徹查真相，仲公布除咗警方會派員調查外，亦「吩咐」勞工處派出勞工事務主任，係處方首次派員前赴海外搜證，唔排除等當事人身體康復，安排佢返香港出庭作證。
下月調任 冇擺上心
不過，佢講嗰時，就用咗「吩咐」呢兩個字，都算係可圈可點，如果係勞工處提出要派員，就唔使局長「吩咐」喇，即係話卓永興冇建議過，好明顯係唔踢唔郁，幫人都慢三拍喇！究竟佢有冇擺呢件事上心，抑或佢諗住下個月中就調任政務主任招聘委員會主席，個心早就調走咗？
